Om Fjærland 
print Man 23. Mai 11 15:38

Når du skal til bokbyen i Fjærland:Ta deg tid, skaff deg overnatting og få med deg heile ”Fjærlandspakken”. Du treng mange timar i bokbyen. Det er meir enn ti andre utsal med bøker og teikneseriar attåt butikken vår.

Men det er mykje meir i Fjærland. Norsk bremuseum held til i eitt av dei mest berømte byggverka teikna av arkitekt Sverre Fehn. Det over hundre år gamle trehotellet Hotel Mundal teikna av Peter Andreas Blix står majestetisk midt i bokbyen. Ved Bøyum Camping er det sandvolleyballbane og fuglereservat med kikkartårn. På turistinformasjonen kan du leiga sykkel og oppleva eit kulturlandskap halde i hevd av eit aktivt og levande jordbruk. Og kring det heile er naturen, naturen som aldri sluttar å imponera sjølv godt vande nordmenn. Steil og majestetisk, med stadig skiftande lys, og ein blomeomkransande bygdeveg med ordentlege stabbesteinar. Brevatnet gjev både elvar og fjord ei karakteristisk blågrøn farge. Ingen annan stad i Sør-Noreg er avstanden kortare mellom bre og fjord. Det er kanskje den viktigaste grunnen til at turistane byrja å komma hit i andre halvparten av 1800-talet. Bokbyen ligg i Mundal, to kilometer frå bremuseet og staden der ekspressbussane stoppar. Om sommaren kan du landa rett i bokbyen ved å ta båten/ferja frå eller til Hella eller Balestrand, to avgangar kvar veg. Det er ein ferjetur verdt å oppleva.

Fjærland har hotell, ein moderne campingplass og ei rad rom og hytter til leige. Sjå heimesidene til Fjærland reiselivslag.

23052011_100332_0.jpg